Aðgengi og þjónusta

Ekið er að Kerlingarfjöllum um Kjalveg (F35), þaðan sem beygt er inn á Kerlingarfjallaveg (F347). Fært er fyrir alla jepplinga og stærri bíla og engin vöð eru á leiðinni. Þjónustumiðstöð er rekin í Ásgarði þar sem hægt er að kaupa veitingar og gistingu í svefnpokaplássi, skálum eða á tjaldsvæðinu. 

Nánari upplýsingar um þjónustu í Kerlingarfjöllum má finna á www.kerlingarfjoll.is

Frá Ásgarði er um 15 mínútna gangur eða 1,1 kílómetri upp meðfram Ásgarðsá í heita laug þar sem hægt er að baða sig. Vatnið í lauginni kemur í borholu við árbakkann og er á milli 30-40°C heitt 

Um tveggja tíma akstur er um Kjalveg frá Gullfossi að Kerlingarfjöllum. Á leiðinni er hægt að kaupa veitingar og gistinguí Árbúðum og Hvítárnesi. Hvergi er hægt að kaupa eldsneyti á Kili, en nálægasta bensínstöðin er á Geysi

Vegslóðar liggja einnig að Kerlingarfjöllum að sunnan (Leppistunguleið) og að austan (Setursleið). Þær leiðir eru torfærar, grófar og aka þarf yfir óbrúaðar ár og læki. Einungis er mælt með að vel búnir fjórhjóladrifnir jeppar fari um þessa slóða. Leiðirnar opnast seinna á sumrin en Kjalvegur sökum aurbleytu og hættu á skemmdum ef ekið er um þær of snemma.